Uisge glas fo d`fhiaclan?

Brot Gàidhealach

2011-08-10T14:51:00.000-07:00

'S fhada bhon uair sin!

Tha cor na feadhnach a tha geur air biadh ùr, math air leasachadh bho chionn ghoirid, co-dhiù timcheall air Drochaid an Eilean Sgitheanaich agus na h-àiteachan faisg air. Anns a' Chaol, gheibhear a' Bhùth Bheag a tha a' sònrachadh ann an toradh na mara gu h-àraid, ach a tha cuideachd na delicatessen anns am faighear càise, dearcan-ola agus iomadh rud sòghail eile. Tha an t-iasg agus maorach aice fìor ùr, is iad ann an deagh chuladh.

Bhon a bha mi ann an Iapan, tha mi a-nis air leth dèidheil air toradh na mara, agus chan e maorach is iasg a-mhàin a dh'itheas mi, ach feamainn!! Bha a' Bhùth Bheag ann an Caol Loch Aillse a' reic feamainn chaoinichte turas a bha mi ann. Cheannaich mi pacaid, agus 's ann à Èirinn a thàinig i. www.seaveg.co.uk à costa glan Dhun nan Gall anns an iar-thuath. Tha oifis aca ann an Roslin, Meadhan Lodainn, a rèir coltais.

BROT TIUGH DE DH' FHEAMAINN IS BUNTÀTA le Tùna

Airson brot do 2 -3 daoine, feumaidh tu:

cnap ìme
uinnean beag, geàrrte ann am pìosan garbha
buntàta (mu cheithir buntàta meadhanach mòr), geàrrta ann am pìosan
1 -2 churran bheag, geàrrta ann am pìosan
min-choirce (làn do chròig)
salann is peabar, (meud a rèir na tha a' còrdadh riut)
sùgh èisg (gu leòr airson na glasraich a chòmhdachadh, chleachd mi 1 chiùb Knorr)
Binigear braiche (spàin-teatha/bhùird a rèir do mhiann)
feamainn mheasgaichte, làn do chròig den stuth tioram (chleachd mi pacaid de "Mixed SeaVeg" anns a bheil slòcan, duileasg, smeartan agus spirulina.)
cana tùna (no iasg sam bith eile).

An Dòigh

An toiseach, cuir an fheamainn gu bogadh ann an uisge fuar fad greiseag. Nuair a dh'atas i, tha i deiseil airson cleachdadh.
Leagh an cnap ìme ann am poit dhomhainn air teas 3/4 (dealan), teas meadhanach màlda.
Bruich an uinnean gus am fàs e tais.
Cuir am buntàta agus curra(i)n ann, agus cùm ort gam bruich air teas meadhanach fad 10-15 mionaidean.
Cuir salann is peabar ann a rèir do mhiann.
Cuir a' mhin-choirce ann agus measgaich gu math i an lùib na glasraich.
Cùm ort ga bruich air teas meadhanach màlda fad mu 4-5 mionaidean.
Cuir an ciùb de shùgh èisg Knorr ann, agus dòirt uisge teth air uachdar, gus a bheil e a' còmhdachadh a' bhìdh anns a' phoit.
Measgaich gu math a h-uile sìon, agus cùm ort ga chaoin-bhruich gus am bi a' ghlasraich maoth.

Faodar a-nis am binigear braiche a chur ann ma thogras tu. Tha mi fhìn a' meas gu bheil e a' cur ris a' bhlas.

An Ceum Mu Dheireadh

Cuir an tùna ann, agus tog a' phoit far an teas.
Cuir an fheamainn ann, agus measgaich gu math. (No faodaidh tu an fheamainn a chur anns a' bhrot nuair a bhios e ann am bobhlaichean dhaoine).

Puing chudromach ri thoirt fa-near.

Tha e cudromach nach tèid an fheamainn a bhruich cus, oir aon uair 's gu bheil i air at, tha i deiseil airson ithe. Bidh an fheamainn mì-bhlasta 's air a slaopadh ma bhruicheas cus i, seach a bhith ga cur gu dìreach anns a' bhrot dheasaichte.

Maki-zushi no Sushi cuairsgte

2010-12-07T16:57:00.000-08:00

Tha am facal Iapanais, maki - 巻き - a' ciallachadh cuairsg (roll up) agus thig an sushi seo fon t-seòrsa sa bheil an rìs air a chuairsgeadh ann an nori - duilleagan tana cràsgach den fheamainn Porphyra Tenera, a tha càirdeach do shlòcan. Coltach ri pìosan sushi sa bheil an t-iasg air muin an rìs, faodaidh an lìonan a th' air a phasgadh am broinn an rìs ann am maki-zushi a bhith ùr-amh no bruich.

Ged a dh'fhaodas glasraich a bhith san lìonan, gun sgeul air iasg, thathar a' cantainn sushi ris a' bhiadh seo fhathast. 'S e sin a chionn 's gur e an rìs agus an t-iasg le chèile air a bheil an t-ainm sushi. Cha chanar sushi ris an iasg leis fhèin, oir 's e sashimi a th' ann mura bheil rìs ann.

Anns an Eilean Sgitheanach far nach eil mòran èisg ùra rim faotainn gu soirbh, a thaobh 's gu bheilear gan cur air falbh chun na Roinn-Eòrpa agus chun nam bailtean mòra air tìr-mòr cho luath 's a thèid an glacadh, 's dòcha gur e maki-zushi an seòrsa as fheàrr air am fiach oidhirp a thoirt. Ma cheannaicheas sinn iasg ùr às a' Cho-op, chan eil teagamh ann nach feàirrde dhuinn a bhith ga bhruich mus dèan sinn feum dheth, oir chan eil fios dè cho fada 's a tha e air a bhith air a shlighe thugainn. Do mhakizushi, gabhaidh tùna bho chanastair, no mùsgan-caola bruich a chleachdadh.

'S e makizushi aon de na seòrsaichean sushi as fhasa a dhèanamh, nam bharail fhèin, agus nì iad deargadh mòr air duine sam bith a thig a chèilidh ort, le cho grinn 's a tha iad air an truinnsear.

Airson Maki-zushi a dhèanamh, feumar na ceithir bathair-bìdh a chithear ann an aghaidh an deilbh seo shìos agus bratag chuilc Innseanach *bamboo (maki-su):

(bhon làimh chlì)

sùgh-geur rìs
sabhs sòighea Iapanach
nori
wasabi

Mura bheil thu faisg air bùth bhathair-bhìdh Àisianach, chan eil agad ach òrdan a chur a-steach do IONAD IAPAIN ann an Lunnainn, agus thèid an tarraing dhut air-loidhne ma tha thu a' fuireach san Rìoghachd Aonaichte.

Chan eil am bathar as cudromaiche anns an dealbh seo ge-tà, agus 's e sin an rìs fhèin. Gheibhear poca beag rìs sushi anns a' chuid as motha de bhùthan-bìdh, air cho beag no mòr 's a tha iad. Cha mholainn dhut rìs sam bith eile a cheannach na rìs sushi ceart. Tha gràinneanan rìs Iapanach tiugh agus goirid, coltach ri rìs risotto na h-Eadailt. Tha barrachd stalc ann an rìs Iapanach a tha deatamach airson 's gun lean na gràinneanan ris a chèile. Tha dòigh chòcaireachd an rìs gu math cudromach cuideachd! Mura faigh thu grèim air rìs Iapanach, 's e rìs risotto an aon seòrsa rìs as dòcha a ghabhas cleachdadh.

A' deasachadh an Rìs Sushi

Uidheam a tha a dhìth: Poit le ceann, stòbh (dealain no gas), bobhla tana leathann, no tuba mòr, spàin mhòr fiodha, soitheach beag

Bathair a tha a dhìth: Rìs Sushi, Sùgh-geur rìs, Siùcar, Salann

Ma chleachdas tu aon chupa de rìs, feumaidh aon is còigeamh cupannan de dh'uisge, agus gheibhear 2 chupa gu leth de rìs bruich bho sin. * AON CHUPA = 240ml no 200ml

Airson 2 chupa rìs, lìonar le 2 chupa de dh'uisge, agus gheibhear mu 5 cupannan de rìs bruich.
Airson 3 cupannan rìs, lìonar le bho 3 gu 3 agus cairteal de chupannan uisge, agus gheibhear mu 7 cupannan gu leth de rìs bruich.
Airson 4 cupannan rìs, lìonar le bho 4 gu 4 gu leth cupannan uisge, agus gheibhear mu 10 cupannan de rìs bruich.

An toiseach, feumaidh tu an rìs a sgoladh ann an uisge corra uair airson a' chorralach stailc a ghlanadh dheth. Nuair a dh'fhàsas an t-uisge meadhanach soilleir, tha an rìs deiseil airson bruich.
Cuir ceann air a' phoit sa bheil an rìs is uisge, agus thoir chun a' ghoil e. Nuair a thòisicheas e air goil, cuir an teas sìos gu grad chun na h-ìre as ìsle. (Mas e stòbh dealain a th' agad, ullaich dà hoban, aon aig teas àrd, agus aon aig an teas as ìsle.) NA TOG ceann a' phoit idir! Cùm a' dol a' bruich an rìs air an teas fìor ìosal seo agus a' phoit còmhdaichte fad mu 30 - 40 mionaid. Tha e deiseil nuair nach eil uisge air fhàgail anns a' phoit, agus bu chòir gràinneanan an rìs a bhith a' leantainn ri chèile. Cha bu chòir an rìs a bhith a' leantainn ri bonn na poite, ach ma dh'fhaoidte rud beag. Cuir an rìs ann am bobhla leathann tana fiodha, no ann an tuba mòr tana.

An Sgeadachadh

Ann an soitheach beag, measgaich an sùgh-geur rìs, siùcar agus salann.

Airson 2 chupa gu leth de rìs bruich, feumaidh 2 spàin-bhùird de shùgh-geur, leth spàin-tì de shiùcar agus 1 spàin-tì de shalann.
Airson 5 cupannan de rìs bruich, feumaidh 3 gu leth sp-bh de shùgh, 1 sp-bh de shiùcar agus 1 sp-tì gu leth de shalann.
Airson 7 cupannan gu leth de rìs bruich, feumaidh 5 sp-bh de shùgh, 1 sp-bh gu leth de shiùcar agus 2 sp-tì de shalann.
Airson 10 cupannan de rìs bruich, feumaidh 7 sp-bh de shùgh, 2 sp-bh de shiùcar agus 3 sp-tì (1 sp-bh) de shalann.

Crath a' choimeasg seo air an rìs ga mheasgachadh gu math fhad 's a tha e blàth fhathast. Glèidh an rìs ann am bobhla fiodha, no tuba fiodha còmhdaichte le clobhd tais gus a bheil thu deiseil airson sushi a dhèanamh.

An Sushi cuairsgte as fhasa - Kappa-zushi

Tàth-chuid airson 4 rolan kappa-zushi

1 chupa is da-thrian de rìs sushi deasaichte
2 dhuilleag den fheamainn, nori
1 chularan Iapanach, no leth-chularan Eòrpach
1 spàin-bhùird de wasabi

Bathar eile a tha a dhìth: sabhs sòighea
Uidheam eile: maki-su 巻きす (bratag chuilc Innseanach - chithear san dealbh gu h-àrd i)

Geàrr an fheamainn nori na dà leth, agus cuir aon duilleag air am maki-su, 巻きす, (bratag chuilc Innseanach). * Le seo, bidh na rolan nas taine na makizushi eile.
Geàrr an cularan san aon fhad ris an nori.
Geàrr an cularan na dhà leth air fhad.
Sgaoil cairteal den rìs sushi air an fheamainn nori, a tha air a' bhratag. Fàg mu 2.5cm de bheàrn aig gach ceann den duilleag nori.
Cuir beagan wasabi ann am meadhan an rìs bho cheann gu ceann.
Cuir aon leth den chularan ann am meadhan an rìs.
Tòisich air cuairsgeadh le bhith a' togail na brataig agus a' cumail a' chularain sìos le do mheuran.
Cuairsg gu teann e agus brùth gach ceann den rola cuideachd.
Dèan an aon rud cheudna airson a bhith a' dèanamh nan trì rolan eile.

Makizushi eile

Tha e a-rèir do mhiann fhèin na chuireas tu anns na rolan sushi. Tha caochladh stuth a dh'fhaodas tu cur annta. Seo agad corra eisimpleir den chaochladh nithean a ghabhas cur còmhla.

a. Tùna bhon chana, le mayonnaise agus/no rud beag sabhs sòighea agus cularan
b. Omaileid tana, bloineagan-gàraidh, balgan-buachair shiitake
c. Pìosan tùna ùr-amh, uinnean-earraich

Makizushi mùsgan-caola

Omaileid tana - airson 1-2 dhuilleag de dh'omaileid a dhèanamh, measgaich 1 sp-tì de chornstarch, 1 sp-tì de dh'uisge agus craiteachan salainn. Cuir seo ri dà ugh a th' air an togail. Suath beagan ola air sgeileid teflon agus dòirt gu leòr den ugh a chòmhdachadh tòn na sgeileid. Tog agus cuir an sgeileid mun cuairt mar chuibhle. Tha an omaileid deiseil nuair a lùbas a h-oirean agus nuair a dh'fhàsas an t-uachdar gleansach.

1 chupa dà thrian de rìs sushi deasaichte
Mùsgan-caola - mu 10 dhiubh
Dà dhuilleag nori
fras seasamain
wasabi
sabhs sòighea

Cuir aon duilleag nori air bratag chuilc, taobh lìomhte foidhpe, agus sgaoil leth-chuid den rìs oirre. Feumaidh mu 1cm de bheàrn fhàgail bhon oir-thoisich agus 2cm bhon cheann.
Crath beagan fras seasamain air an rìs.

3. Cuir tomhas de wasabi ann am meadhan an rìs a rèir do mhiann.
Cuir duilleag omaileid ann.
Cuir na mùsgan-caola thairis air an rìs air muin na h-omaileid.
Tog a' bhratag le d' òrdagan, agus a' cumail do mheuran air an stuth anns a' mheadhan.
Cuairsg gu teann.
Brùth gach ceann den rola le meuran.
Fliuch sgian agus geàrr ann an 6 - 8 pìosan. Tha an sgian air a fliuchadh gus nach lean an rìs rithe cus.

Aran-coirce le Feamainn Wakame

2010-09-18T02:11:00.000-07:00

Anns a' phìos seo, cha mhòr nach eil mi air mo bhuaireadh gus ceann-tiotal a leithid "Biadh Albannach air amaladh le biadh Iapain" a chur ann; ach ann an dòigh, bhithinn fada ceàrr gearr-thuairisgeul mar sin a thoirt air an aiste seo.

Chan fhada bhon a bha feamainn glè chumanta air bùird chidsin ann an dachaighean air feadh Eileanan agus coimhearsnachdan oirthireach na Gàidhealtachd. Agus, coltach ri ar co-Cheiltich, na Cuimrich, bhathar a' gabhail feamainn mar bhiadh an lùib a' mhìn-choirce.

San latha a th' ann, tha seòrsa bìdh a tha iad a' deasachadh anns a' Chuimrigh air a bheil "Aran Slòcain". Tha slòcan (uaireannan: slabhagan, slabhcan, slabhacan) na fheamainn dearg - "porphyra umbilicalis" - a gheibhear ann an cruth slamanach anns na bùithtean an sin.

Cruth slamanach slòcain anns a' Chuimrigh

Nì iad bonnach coirce air muin na feamnach, ga fhrithigeadh le hama na chois.

Aran-slòcain na Cuimrigh

Ann an Iapan, tha an fheamainn a bhios iad a' cleachdadh airson sushi a dhèanamh càirdeach ri slòcan. 'S e "Nori" an t-ainm Iapanach air Porphyra Tenera. Gheibhear ann an cruth slamanach e a cheart choltach ri slòcan anns a' Chuimrigh, ach le siùcar, sabhs soighia agus nithean eile a chuireas blas ris. 'S e an cruth as cumanta anns an lorgar nori ge-tà, agus air as motha bheil de aithne taobh a-muigh Iapain, ach na duilleagan tioram tana criospach coltach ri pàipear mar anns an dealbh seo shìos.

Bidh luchd-deasachaidh a' pasgadh cuid de na pìosan sushi anns an fheamainn seo, nori. Agus 's e sin as ciall don t-seòrsa sushi air a bheil "Maki-zushi (巻きずし） Tha "Maki" a' mìneachadh mar a thathar a' cuairsgeadh an sushi anns an fheamainn, ga phasgadh ann an cumadh rola.

Niste, 's tric a bhios mi a' deasachadh aran-coirce aig an taigh oir tha e blasta, fallain agus furasta a dhèanamh. Ach, 's minig cuideachd a bhios mi a' teasachadh brot le wakame - seòrsa feamainn eile à Iapan. Wakame - duilleagan na feamnach duibhe Àisianach (Undaria Pinnatifida) a tha coltach ri mircean (alaria esculenta)

Chan e feamainn dearg a th' ann an Wakame ge-tà. 'S i feamainn bhuidhe (Algae donn) a th' ann. (Undaria pinnatifida) Agus, tha wakame air a bhuain bhon duilleag mhòr, no an liadhag a tha a' fàs air stamh na feamnach - 's e sin cas na feamnach. Bho chionn ghoirid, thathar a' tòiseachadh air reic na buinneagan a tha a' fàs aig bun na feamnach, agus canar mekabu riutha seo.

Niste, 's e mircean an t-ainm Albannach air an fheamainn alaria esculenta. 'S e sin feamainn bhuidhe eile a gheibhear bho chladach na h-Alba agus a ghabhas ithe.

Chithear gu bheil crios anns a' mheadhan - ' s e sin stamh no cas na feamnach, agus an rùsg no an liadhag air gach taobh. Tha liadhag a' mhircean coltach ri Wakame.

An-dà, bha bobhla beag wakame air fhàgail agam nach do chuir mi anns a' bhrot a bh' agam an latha roimhe. Mar sin, shaoil mi gur e deagh bheachd a bh' ann, an fheamainn bhruich ghorm seo a chur anns a' mhìn-choirce agus ga fuine an cois an arain-choirce san àmhainn. 'S e sin an dearbh rud a rinn mi agus fhuair mi aran-coirce le Feamainn Wakame mar thoradh! Blasta, criospach, cruasbach agus fallain!

生姜焼き（Shougayaki) - Muc-fheòil ann an sabhs soighia agus dinnseir

2010-08-05T15:02:00.000-07:00

'S e biadh cumanta a th' ann an Shougayaki. Tha e bitheanta air clàran nan taighean-bidhe teishoku （定食） ann an Iapan.

Anns na taighean-bìdh seo (a tha dha-rìribh nan taighean oir, gu math tric 's ann a bhios teaghlach ga ruith bhon taigh aca fhèin), gheibhear teishoku (brìgh: tràth-(bìdh) suidhichte) no set-meal, aig àm nòin no àm dìnneir - agus tha na tràthan-bìdh suidhichte seo gan tairgsinn aig prìs reusanta saor eadar ￥500~￥１，５００　（eadar £2.00 - £10). Bidh cuid aca fosgailte gu 10 uairean air an oidhche.
Mar a tha "Truinnsear tòiseachaidh, prìomh thruinnsear agus am mìlsean" stèidhichte againne, 's ann a tha rian-ithe aig muinntir Iapain cuideachd. Ach, tha an rian-ithe seo gu tur eadar-dhealaichte. Aig tràth-bìdh an taighe, no anns na taighean-bìdh teishoku, gheibhear :

bobhla beag brot miso
bobhla beag ruis
meanbh-thruinnsear de dhiofar phicilean slisnichte
prìomh thruinnsear (iasg no feòil)
truinnsear beag de ghlasraich
truinnsear beag de shailead is annlan....

Teishoku cumanta

.......uile an cois a chèile. Tha am biadh air a dheasachadh ann an dòigh eadar-dhealaichte air gach truinnsear. Mar eisimpleir, bidh aon truinnsear de bhiadh ròsta, aon air a bhruich, aon air a ghrìosachadh, aon amh agus mar sin sìos. Thathar am beachd gu bheil na diofar dhòighean còcaireachd seo a' toirt co-chòrdadh don tràth-bìdh gu lèir. Ma bhios aon truinnsear de bhiadh ròsta ann, bidh truinnsear beag de bhiadh ceò-bhruich (steamed) ann airson co-chòrdadh a thoirt eatorra.

SHOUGAYAKI
San reasabaidh seo, thathar a' cleachdadh stiallaich thana de mhuc-fheòil bho leasradh a' bheathaich. Tha an fheòil air a bogadh ann an lionn de shake, dhinnsear sgrìobte, mirin (fìon-ruis milis) agus sabhs soighia.
Tàth-chuid

An lionn bogaidh (A):

1 spàin de shake
1 spàin de dhinnsear sgrìobte
1 spàin de mhirin2 spàin de shabhs soighia

Eile

Leth-uinnean mòr, mìn-shlisnichte
Stiallaich thana leasradh mhuc-fheòil

Dòigh chòcaireachd
1. Measgaich a h-uile rud (A) airson an lionn bogaidh a dhèanamh.

2. Càraich na stiallan feòla sinte ann an soitheach leathann tana, agus taom an lionn (A) orra. Fàg iad gam bogadh mu 20 mionaid.
3. Frighig na sliseagan uinnein sa phana ann am beagan ola.

4. Frighig na stiallan muc-fheòil air teas meadhanach àrd.
5. Taom an còrr den lionn (A) anns a' phana. Leig leis còcaireachd rud beag a bharrachd.

NB1.
Bithear gu tric a' riarachadh seo le bobhla ruis, bobhla brot miso, agus le sailead de chàl geal sgrìobte.

Eisimpleir de Shougayaki
NB2.

Mura faigh thu grèim air stiallan tana leasraidh, tha e ceart gu leòr pìosan nas tiugha a chleachdadh. Ach, bidh agad ri bhith gam bruich nas fhaide mun tèid an lionn (A) a dhòrtadh orra. Seo na rinn mi fhìn.

Aran air ùr-fhuine!

2010-06-06T12:28:00.000-07:00

Rolaichean no 'baps' Albannach, agus aran-coirce fodhpa.

Aran dearcach (fìon-dearcan caoinichte) agus aran-cruithneachd Eadailteach.

Airson dà lof de aran-cruithneachd a dhèanamh, feumaidh:

Mìn chruithneachd - 350g (3 cupannan)
Mìn lom (gheal) - 300g (2 is trì chairteal de chupa)
Uisge meadh-bhlàth - 1 is cairteal de chupa/300ml
Beirm *grad-phùdar - 2 mheanbh-phacaid (sachet)
Salann - 2 -3 spàinean-teatha
Siùcar - 1 spàin-teatha

*Ola chroinn-ola - 3-4 spàinean (roghainneil)

1) Cuir an t-uisge meadh-bhlàth ann am bobhla beag leis a' bheirm agus an t-siùcar na chois. Fàg seo 10 mionaidean.

2) Criathraich an dà sheòrsa mìn ann am bobhla, agus measgaich iad seo agus an salann le chèile gu math.

3) Dèan toll ann am meadhan a' mheasgachaidh, agus dòirt an cothlamadh de dh'uisge, beirm is siùcar ann. Cuir an t-ola ann cuideachd aig an ìre seo ma bhios tu ga chleachdadh.

4) Measgaich le spàin agus aon uair 's gu bheil a' mhìn agus an t-uisge uile air tighinn còmhla nan cnapan, tòisich air na cnapan a thoirt còmhla le do làmhan gus taois a dhèanamh.

5) An uair sin, cùm a' dol a' fuine na taoise fad mu thuaiream air 10 mionaid, a' crathadh mìn gheal a bharrachd oirre ma dh'fhàsas i ro steigeach.

6) Nuair a dh' fhàsas an taois sùbailte, rèidh agus caran righinn, tha an t-àm ann tàmh a leigeil leatha, còmhdaichte fad 30-40 mionaidean ann an àite blàth. Fàg an taois gus a bheil i dà uair nas motha na bha i.

7) Roinn ann an dà bhuileann i, agus dèan beagan fuine a bharrachd ma dh'fheumas tu mun toir thu cumadh air an dà lofa. 'S fhiach pàtran a sgoradh le sgian air mullach nan lofannan airson 's gun drùidh teas na h-àmhainn tron aran gu lèir.

8) Bruich ann an àmhainn iad air treidhe fad 30-40 mionaidean aig teas 200 puing celsius.

9) Leig leotha fuarachadh air racais.

------------------------------

Aran Dearcach na h-Eadailt

Liosta Tàthchuid

mìn-lom - 12 unnsa/350g
fìon-dearcan caoinichte (raisins) - 1 chupa gu leth
ìm (neo-fhuaraichte) - 2 spàin gu leth
beirm - 1 mheanbh-phacaid (sachet) de ghrad-phùdar no 25g de bheirm ùr
uisge meadh-bhlàth - 150ml/5 unnsaichean lionnach
salann - 2 spàin-teatha
siùcar - 2 spàin-bhùird

Dòigh

1) Bogaich na dearcan caoinichte ann an uisge tlàth fad 10-15 mionaidean airson an taiseachadh.

2) Deasaich a' bheirm anns an uisge mheadh-bhlàth le luchd spàin-teatha de shiùcar. Fàg 10 mionaidean e, no mar sin.

3) Criathraich a' mhìn ann am bobhla mòr domhainn, agus cuir an salann 's an còrr den t-siùcar na lùib. An uairsin, taom a-steach an cothlamadh-beirme agus measgaich e.

4) Nuair a thig am measgachadh ri chèile na chnapan, dèan fuine an taois gus am fàs i sùbailte, rèidh. Leig tàmh leatha, còmhdaichte ann an àite blàth, gus a bheil i air a leudachadh dà uair nas motha; (mu leth-uair - uair a thìde).

5) Traogh na dearcan, agus crath beagan mìn-lom orra airson an tiormachadh.

6) Nuair a bhios an taois air dùblachadh, dèan fuine a-rithist i, ach an turas seo, tha thu a' filleadh an ìm 's na dearcan a-steach don taois fhad 's a tha thu ga fuine le do làimh.

7) An uairsin, roinn i na cuibhreannan co-ionann, crath beagan mìn gheal orra, agus dèan rolaichean fada dhiubh.

8) Fàg iad còmhdaichte fad 30 mionaid a bharrachd.

9) Cuir ann an àmhainn aig teas 200 puing celsius iad, air treidhe a th' air a crèiseadh.

10) Bruich fad mu thuaiream air 20 mionaid iad.

Sliasaidean circe gam bogadh air dòigh Iapanach *no Teriyaki

2010-02-07T03:28:00.001-08:00

An toiseach, mus tèid sinn an sàs anns an reasabaidh fhèin. 'S fhiach a bhith mothachail nach e "Teriyaki" dha-rìreabh a tha seo. Ann an "teriyaki", thathar a' bogadh na feòla ann an sabhs sòighia air a mìlseachadh le fìon-ris milis (mirin) agus sake - agus 's e seo dìreach na bhios sinn a' dèanamh anns an reasabaidh seo shìos. Ach, gus "teriyaki" ceart a dhèanamh, thathar an uair sin a' grèidheadh na feòla gus a bruich, mar air "barbecue" no ga grisg fo bhranndair dealain. Feumaidh teas àrd dian. Agus, 's e sin na th' ann an Teriyaki ceart a rèir mar a thuigeas na h-Iapanaich fhèin am facal. Thathar a' dèanamh na feòla le còmhdachadh lìomharra sabhs soighia milis, ('s e sin　"teri" 照り - còmhdachadh lìomharra) agus ga bruich fo lasair àrd, dian (dealain no eile). (yaki -焼き） Ann am Beurla, 's e Teriyaki a tha iad a' toirt air an t-sabhs fhèin...

Chun an reasabaidh ma-tà!

' S iad sliasaidean circe as fheàrr airson seo air sàilleabh 's mar a nì iad sabhs math gleansach.

Grìtheidean

4 sliasaidean circe

Sabhs - 4 spàin-bhùird sake
4 spàin-bhùird mirin (sake milis)
3 spàin-bhùird sabhs soighia

3 spàin siùcair

2 spàin ola

Seasaman *craiteachan no dhà

Dòigh còcaireachd

1) Briog na sliasaidean circe le forc corra uair.

2) Caraich iad ann am bobhla anns an sabhs.

3) Fàg ann mu 10 - 20 mionaid.

4) Teasaich an t-ola ann am pana grìosaich, agus cuir na sliasaidean circe ann. Gleidh an sabhs anns an robh iad.

5) Grìosaich na sliasaidean (teas meadhanach àrd) agus leig an corr den ola às a' phana an dèidh mu 10-20 mionaid.

5) Còmhdaich am pana agus cùm a' dol a' grìosachadh nan sliasaidean gus a bheil iad bruich nam broinn.

6) Dòirt an sabhs orra, agus cuir an siùcar ann.

7) Thoir crathadh air a' phana gus a bheil na sliasaidean air an còmhdachadh gu leìr leis an t-sabhs.

8) Nuair a dh'fhàsas iad gleansach lìomharra, caraich air truinnsearan iad, agus crath an seasaman orra.

Tha iad math le saileid no glasraich sam bith. Bidh na h-Iapanaich gan ithe le raidis geal sgrìobte mar annlan, a thuilleadh air ris, is brot miso.

Sin agad e! Ith do leòr.

Biadh Iapain ga dheasachadh ann an Alba

2010-01-19T15:16:00.001-08:00

Cha b' e gun robh mi ag ionndrainn biadh Iapain; tha gu leòr de bhiadh Albannach, Sasannach agus Eòrpach an seo a tha a' tighinn rim chàil cho mòr 's nach eil mi a' caoidh cion a' chothroim air sushi no dad eile dhen t-seòrsa sin. Tha Macraes Butchers ann an Caol Loch Aillse a' reic currain cho math 's cho mòr air an do bhlais mi riamh nam bheatha agus feòil eireachdail leithid sitheann airson stiùbha. Cha chreid mi gun tig mi thairis air currain cho àlainn blasmhor riutha ann an àite eile a-chaoidh sìorraidh.

'S e a th' ann ge-tà gu bheil an cuimhneachan a th' agam air blas biadh Iapain agus an t-eòlas a th' agam air cho fallainn is a tha na co-thàthan a tha fillte anns na bathair bìdhe a thig na chois, leithid wakame (feamainn Àisianach a tha càirdeach ri mircean), agus soba (noodles dèanta air cruithneachd-buidhe), gam sparradh gu an cur fam chomhair a-rithist 's a-rithist, agus fa comhair dhaoine eile nach do dh' fheuch orra riamh roimhe. Tha e cho math dhuinn aghaidh a chur ri rudan ùra, nach eil? Chan eil rian nach tig iad ri càil dhaoine nuair a chì iad cho sìmplidh ach fhathast cho fallainn agus blasta a tha iad.

Co-dhiù, dh'òrdaich mi corra bhathar-bidhe à "Ionad Iapain" air-loidhne (japancentre.com) ann an Lunnainn) agus ràinig iad gu sgiobalta sa phost an t-seachdain sa chaidh. Dìreach beagan bathair a tha deatamach ann a bhith a' toirt fìor bhlas dearbhta dùthchasach air a' bhiadh. Feumar sin gun teagamh, oir chan eil a h-uile glasraich is gearradh feòla a th' againn sna bùithtean an seo cho coltach ris an fheadhainn thall an sin, ann an cumadh nì motha ann am blas.

Seo an soba noodles a rinn mi aig an taigh an t-seachdain sa chaidh. Chan eil agad ach an goil 4 mhionaid 's am fuarachadh le bhith a' sruthladh uisge fuar orra gus nach bi iad a' fàs ro thais. Mura dèan thu seo, cumaidh an t-uisge teth gam bruich, ged a tha iad air an toirt às.

Nithear sùgh èisg ann am poit air leth bho phoit nan noodles. An uair sin, cuirear stealladh de shabhs sòighia ris an t-sùgh a rèir do mhiann fhèin, agus dìleag bheag de mhirin (fìon-ruis mhilis) agus sake. Dòirt am brot lionn seo air na noodles ann am bobhla domhainn, no cuach , agus an uairsin faodaidh tu glasraich sam bith eile a chòrdas riut a chuir ris. Bidh mi fhìn a' cur na feamnach ud, wakame, agus dinnsear sgrìobte san t-sùgh agus nì sin a' chùis dhòmhsa!

Mùthaidh mi air co-dhiù dà no trì bhobhla dhen stuth a dh' aon ruith!

Sitheann Stòbhach MhicDhùbhaich

2009-10-26T13:43:00.000-07:00

Chaidh mi air chuairt bheag ann an Caol Loch Aillse aig an deireadh-seachdain, agus a-steach leam dhan bhùidsear air phrìomh shràid. 'S e seo bùth a tha a' reic feòil agus glasraich le chèile - agus - abair gur e bùth math coimhearsnachd a th' ann. Bha a' chuid as motha den ghlasraich air am buain faisg air làimh, air neo co-dhiù ann an Alba. Bha iad a' reic currain mhòra eireachdail agus càl a chaidh àrach san sgìre fhèin. Bha creamh a bhuineadh dhan dùthaich seo - Inbhir Narann.

Cheannaich mi curran, càl mòr, dàrna leth de shnèip agus poca mòr buntàta air an deach comhairle mhath a thoirt leis a' bhana-Ghàidheal ghnàth-eòlach bheag thapaidh a bha gam fhrithealadh aig a' chunntair. A thuilleadh air sin, cha bu leisg leam taghadh a dhèanamh eadar diofar luibhean a bh' aca 's a chaidh àrach san Eilean Sgitheanach fhèin. Roghnaich mi bogsa beag fionnas-gàrraidh à Dùn Bheagain, 's charaich mi sa bhascaid agam fhèin e.

An dèidh sin, thionndaidh mi chun chunntair far an robh an fheòil air fad. Tòrr mòr ghearraidhean feòla. Dh' iarr mi oirre slinneanan Sìneach a thogail airson mo lòin an latha sin fhèin; ach 's e a bh' air clàr-mullaich air a h-uile nì a cheannaich mi sa bhùth sin air fad - a rèir mo bharail fhèin co-dhiù - ach pìosan eireachdail sitheann an fhèidh; dh'iarr mi dà dhòrlach dhith a thomhas dhomh.

Air ais dhachaigh, agus mi air mo chur romham an fheòil 's na glasraich a stobhadh uile! Mar sin, thug mi sùil ann an seann leabhar còcaireachd na h-Alba a tha air mo sheilbhidh bho chionn iomadh bliadhna, agus seo dhuibh a' choimeasg a thog mi às. Sitheann Stòbhach MhicDhùbhaich.
'S i coimeasg a thugadh bho Hotel Crusoe ann am Fìobh ri linn foillseachadh an leabhair, ach chan eil an tionndadh seo cho coltach ris idir. Cha do thog mi às an reasabaidh aca, ach a' chiad dà cheum.

Cungaidh bìdhe: Dà dhòrlach sitheann (pìosan stiubha) Leth-uinnean Dà chlòbh creamha Fìon dearg Sùgh feòla (teth) Cairteil shnèip Corra bhuntàta bheaga Leth-churran mòr Fionnas-gàrraidh mion-gheàrrte (2 dhòrlach) Ìm Salann Piobar Cnò-mheannt Spàin de shilidh raosaran dearga

An toiseach, leagh an t-ìm ann am poit mhòr, agus fraighig an t-uinnean (geàrrte), 's an creamh (mìn-gheàrrte).

Nuair a bhios iad maoth, cuir an t-sitheann ann, agus bruich e gus am bi e ruadh-dhonn. Cuir salann, piobar is cnò-mheannt ann a rèir do mhiann fhèin.

Crath mu dhà spàin-bhùird de mhìn-fhlùr a-steach ann agus cùm a' dol ga bhruich fad 2-3 mhionaid. An uairsin, taom steall math fìon dearg a-steach ann agus lean ort ga ghoil gu brais fad mionaid no dhà, air teas meadhanach àrd.

Dòirt an sùgh feòla (air neo, uisge goileach le ciùb sùgh-feòla) a-steach ann agus an uairsin cuir na glasraich geàrrte uile a-steach dhan phoit.

Feumaidh tu a-nis ga chaoin-bhruich fad uair a thìde le ceann air a' phoit. Thoir dha suathadh beag bho àm gu àm. Aig an deireadh, fhad 's a tha e a' caoin-bhruich fhathast air teas màlda, tilg dà chròglach pearsaill (fionnas-gàrraidh) a-steach ann agus thoir dha suathadh socair slaodach leis an lèigh mhòir fhiodha.

Nuair a bhios e deiseil, 's còir gu bheil an lionn ruadh dhonn, lìomharra agus gu bheil a thòchd is a dhath air a dhrùidheadh a-steach dhan fheòil 's dhan ghlasraich cheudna.

Sin agaibh Sitheann Stòbhach MhicDhùbhaich!

Faclan Feumail

fionnas-gàrraidh = parsley
cròglach/dòrlach - handful
maoth - tender
sitheann - venison
sùgh feòla - meat stock
ga bhrosnachadh/ga chaoin-bhraoich - simmer/simmer gently
gu brais - vigorously
teas màlda - a low heat
steall - a dash
thoir dha suathadh beag - give it a little stir
lìomharra - silky-shiny
tòchd - flavour, smell
cnò-mheannt - nutmeg

Cearc san Fhraoch agus Sabhs na Meala

2009-09-27T08:14:00.000-07:00

Seo reasabaidh a thog mi à làrach eile (Rampant Scotland), ach le beagan atharrachaidh.

Grìtheidean

Cearc shlàn
Leth-chupa ola tana còcaireachd
Cairteal cupa mil
salann
piobar
spàin no dhà de ròs-Màiri (tioram no ùr)
sgeallan dijon (no eile)

Airson an t-sabhs - mìn-fhlùr (dà spàin), ìm (cnap math), bainne slàn (srùbag)

1) Sàth sgian tana air feadh na circe agus càraich ann an soitheach-casaroil i. Tha tuill ann airson gun drùidh am brolamas seo a-steach gu furasta ann an sitheann na circe.

2) Measgaich a h-uile grìtheid eile ann am bobhla agus taom air a' chearc iad.

3) Dèan cinnteach gun tèid a' chearc a chòmhdachadh air fad.

4) Cuir ceann air an t-soitheach-casaroil agus càraich san àmhainn e, aig mu 190-210 puing celcius.

5) An dèidh mu leth-uair a thìde, thoir an ceann far an t-soithich agus cuir air ais e san àmhainn. Leigidh seo cothrom dhan chearc ruadhadh.

6) Nuair a bhios a' chearc air a bruich uile gu lèir, thoir às an àmhainn e.

Airson an t-sabhs

a) Ann am poit bheag, leagh an t-ìm agus crath a' mhìn-fhlùr a-steach ann. Bruich mu dhà mhionaid e,agus an uairsin cuir an lionn is lìth a th' aig bonn an t-soithich-casaroil ris anns a' phoit.

b) Thoir gu goil e. Bidh an t-ola air a sgaradh bhon t-sabhs, mar sin cha leig thu a leas ach an t-ola seo a thraoghadh às.

c) Cuir dìleag bhainne ann agus cùm a' dol ga chur mun cuairt, 's ga theasachadh.

d) Thèid an sabhs a lùghdachadh, agus bidh e deiseil an uairsin airson gabhail leis an t-sitheann agus glasraich sam bith eile a ghabhas tu na chois!

Ith do leòr!

FACLAN FEUMAIL

sgeallan - mustard
dìleag - a dash of
taom air a' chearc iad - pour them onto the chicken
càraich ann an soitheach-casaroil i - place it in a casserole dish
brolamas - mixture
Cuir ceann air an t-soitheach-casaroil - put a lid on the casserole dish
Leigidh seo cothrom dhan chearc ruadhadh.- this will allow the chicken to brown
crath a' mhìn-fhlùr - sprinkle the flour
air a sgaradh - separated
cha leig thu a leas ach - all you need to do is....
an t-ola seo a thraoghadh - .....drain this oil
ga chur mun cuairt - stirring it
sitheann na circe - the flesh of the chicken

Suidhe-bìdh Iapanach

2009-04-26T09:24:00.000-07:00

Bhon a bhios mi a’ falbh a-rithist ag imeachd air ais do Alba ann an ùine nach bi fada, tha an t-sean-fhacail “nì an imrich thric an àirneis lom” a’ tighinn a-steach orm an-dràsta, ach gu dearbha, ged a tha an àirneis agam a’ sìor fhàs lom ‘s mi ullachadh airson imeachd, tha mo phraisean ‘s mo shoithichean agam fhathast.

Mar sin, ar leam gur e àm math a th’ ann, tràth bìdh Iapanach a dheasachadh dhuibh mar is gnàth le muinntir na dùthcha seo bhith dèanamh aig an taigh. Tha caochladh seòrsachan bìdhe rim faotainn an lùib seo; ach ‘s e is ni do thràth bìdh Iapanach am bitheantas: - bobhla ruis, picillean de sheòrs’ air choireigin, bobhla beag brot miso (le dà sheòrsa lus, no stuth-bìdh eile na bhroinn), truinnsear le feòil no iasg grìosaichte, (no bruich), agus soitheach beag eile le sailead, no lusan chaoin-bhruich na bhroinn.

Gabhar biadh mar seo a h-uile latha ann an Iapan sa chumantas, agus is seiseach leams’ e gun teagamh sam bith. Bidh mi ag ionndrainn na bìdhe seo gu mòr nuair a thilleas mi. Seo dhuibh samplair de shuidhe–bidh sìmplidh traidiseanta a ghabhas dèanamh aig an taigh gu soirbh.

Cungaidhean-bìdh.

An toiseach, cheannaich mi pacaid beag Asari (あさり) Ruditapes decussate. ‘S e seòrsa bhainteag a th’ annta (Japanese littleneck clam) sa Bheurla.

Bainteagan sgruigeanach Iapanach (Asari no Ruditapes decussate)

Cheannaich mi mekabu めかぶ.

Mekabu

‘S e seo seòrsa dh’ fheamainn a tha in-ichte. Roimhe, cha b’ e ach duilleag bhàrr na feamad seo Undaria pinnatifida,(wakame) a bhathas a’ reic, ach bho chionn beagan bhliadhnaichean, thathar a’ reic an duilleach aig bun na feamad cuideachd. ‘S e an duilleach, buinneagan na feamad – ‘s e sin an liadhag agus an stamh (‘an duilleag mhòr agus a’ chas air am bheil e fàs). ‘S e an gnè Eòrpach a tha càirdeach rithe – mircean.( alaria esculenta)

Mu dheireadh, fhuair mi òrd èisg air am bheil “karei” カレイ an Iapanais. ‘S e seòrsa fhleogan a th’ ann an karei – mar lèabag. Agus, seo agam letheach dheth.

Cha do chosg seo uile ach mu 800 yen. Airson a’ bhrot miso, tha taois miso

Taois miso

sa frids agus airson picillean a chur còmhla ris an ruis, tha pìosan cularan saillte agam ann. Airson an t-saileid, tha cnap mòr raidis geal àisianach (daikon大根) agam mar an ceudna.

Raidis daikon

An Rus

Sa chiad dol a-mach, tha mi a’ sgoladh dà chupa ruis corra uair ann an uisge, agus an uair sin a’ suidheachadh a’ chucair-ruis (rice cooker) airson an ruis a bhruich. Tha rus Iapanach mar is trice feumach air sgoladh uisge a thoirt dha mus bruichear e.

Brot Miso

An uairsin, deasaichear am brot miso. Dh’ fhàg mi na bainteagan beò fad 30 mionaid ann an uisge saillte ach am biodh iad glan nuair a chuireas mi anns a’ phoit iad. Chuir mi am mekabu a-steach ann an uisge goileach fad 3-4 mionaidean gus an robh e air a ghormadh gu h-iomlan.

An fheamainn air gormadh

Cha eil agam an uairsin ach sùgh-èisg a dhèanamh agus na bainteagan a bhruich corra mionaid. Suathar an taois miso troimh shìolachan anns an t-sùgh. ‘S e seo am brot miso deiseil. An Saileid

Tha mi a’ mìn-shlisneadh a’ raidis daikon, agus a bhogadh ann an uisge fuar gus cur às do ghairgead sam bith a dh’ fhaodas bhith ann. Sin e deiseil!

An t-Iasg – an lèabag.

Salann is piobar – a-steach sa phrais le beagan ola. Cuibhrig meatailt ga chòmhdachadh. Iasg – deiseil!
Houji Chaほうじ茶 – Tì uaine ròsta (Tì an fheasgair)

Coire air an teas. Duilleagan tì sa phoit. Gaoir is stoth a’ choire. Dòrtadh sa phoit-teatha. Duilleagan sùghaidh, tì chùbhraidh – deiseil!

Seatadh a’ bhùird an seo ma-tà.

An ruis le cularan saillte.
An t-iasg grìosaichte le beagan sabhs sòighia
Am Brot Miso le bainteagan is mekabu.
An Raidis daikon mìn-shlisnichte le sabhs saileid (aojiso), sgeadaichte le pìosan nori.
An tì uaine ròsta (bancha)

Làmh fhada agus cead a sìneadh!

Soupe à l’oignon gratinée (Brot-uinnean Frangach)

2009-02-26T23:19:00.000-08:00

Grìtheidean

6 spàin-bhùird ìm
Spàin-bhùird ola olaidh
3 punnd dh’ uinneanan meadhanach, rùisgte,mìn-shlisnichte
1 spàin-teatha shiùcar
Salann
1 spàin-bhùird mhìn-fhliùir
8 cupannan shùgh mairtfheòil
2 chupa fìon searbh geal
Peabair dubh ùr-bhleithte
1 bhaguette
1 phunnd chàise Gruyere, na chriomagan

Seòl

Leagh 3 spàin-bhùird dhen ìm agus an t-ola ann am prais mhòr throm. Cuir na h-uinneanan a-steach ann, cuir ceann air a’ phrais agus bruich mu 20 mionaid, gan suathadh mun cuairt gus am bith iad tais, trì-shoillseach. Àrdaich an teas gu meadhanach-àrd agus cuir an siùcar agus salann ann. Cum a’ dol gam bruich, gan cur mun cuairt gu tric is minig ach am bi iad glè thais agus òrdhonnach.

Lùghdaich an teas gu meadhanach, crath a-steach beagan fhliùir agus bruich iad, gan sìor chur mun cuairt fad 2-3 mionaidean. An uairsin, cuir mu dhà chupa dhen t-sùgh ris agus coimeasgaich, ‘s an dèidh sin, cuir an còrr de na 6 cupannan sùigh agus am fìon. Saill agus peabraich a-rèir do bhlas fhèin agus caoin-bhruich fad 30 mionaid e. Feuch blasad dhen t-sùigh, ach am bi e a-rèir do thoil fhèin.

Sgonaichean Mìn-choirce

2009-02-01T09:04:00.000-08:00

Grìtheidean
(airson 8 sgonaichean)

175g Mìn-chruithneachd (mìn-fhliùr àbhaisteach)
50g Mìn-choirce
2 spàin-teatha Mìn-sgrisleach (Cream of Tartar)
1 spàin-teatha sòda bith-charbonach
Craiteachan salainn
50g ìm no margarain
150ml bainne

An toiseach, criathraich a’ mhìn-fhliùr ann am bobhla. Measgaich a-steach na grìtheidean tioram uile. Suath am margarain, no an t-ìm, ann uile gu lèir.

Dèan toll anns a’ mheadhan agus taom a-steach am bainne. Measgaich a h-uile sian ach am faighear taois.

Cuir a-mach air bòrd-fuine i agus na dìochuimhnich mìn-fhliùr a bharrachd a chrathadh air, gus nach lean an taois ris. Cha leigear a leas ga taoisneachadh cus mus gabh a leanachadh aig an deireadh.

Gheibhear air 8 sgonaichean (trì-cheàrnach) a ghearradh àiste gu nàdarra.

Fuin ann an àmhainn teth iad (220 ceum celcius) fad 10 mionaidean, air neo, air greideal teth fad 10 mionaidean ach a’ cur car dhiubh leitheach àm na còcaireachd gus am bi iad òr-dhonn air an dà thaobh.

Bruthaist na beatha!

2009-01-19T09:58:00.000-08:00

Bruthaist ùr?

Chan eil fhios an do rinn cuideigin rudeigin coltach ri seo, ach co-dhiù, bha mi a’ toirt sùil air leabhar biadh albannach agus bha reasabaidh ann airson Sùgh Chàise Cheddar Albannach.

Anns an reasabaidh seo, bithear a’ grìosachadh mìrean uinnein ann an ìm sa phrais, agus a’ cur mìn-chruithneachd riutha, ‘s gam bruich fad beagan mhionaidean. An uairsin, lìonar a’ phrais le uisge no brìgh fheòil de sheors’ air choireigin agus bainne. Bithear ga thoirt chun ghoil, agus an uairsin a’ lùghdachadh an teas mun tèid an càise a chur ann.

‘S e rinn mi fhìn cia-tà, ach seorsa bruthaist, ‘s cha b’ e, sùgh.

Bruthaist na beatha!

(Bruthaist le uinnean, uisge-beatha agus càise Cheddar Albannach)

Airson dithis no triùir.

Cungaidhean

Leth-uinnean, sgudaichte
Bobhla beag de chàise Cheddar Albannach, 12 mìosan air abachadh
Mu 2 unnsa ìm (cnap de mu 6cm air 3)
Spàin-bhùird de dh’ uisge-beatha
Da spàin-bhùird de mhìn-choirce mheadhanach
Bainne is uisge, leth mar leth a lìonas prais bheag
Boiseag de phearsal ùr.

An toiseach, bhruich mi pìosan sgudaichte de leth-uinnean ann am beagan de dh’ìm. Chuir mi mu dhà spàinne-bhùird mhìn-choirce mheadhanach ann agus chum mi a’ dol ga bhruich corra mhionaid.

Bha a’ mhìn-choirce a’ donnachadh agus a’ leantainn ri tòin na praise, mar sin dheth, chuir mi a-steach mu spàinne-bhùird a dh’ uisge-beatha (mac na braiche), agus rinn sin na bhios fìon dearg no geal a’ dèanamh - a’ maothachadh an stuth cruaidh an tòin na praise ach an tèid a sgrìobadh aiste. (deglazing sa Bheurla)

An uairsin, thaom mi a-steach uisge agus bainne, leth mar leth. Chuir mi a-steach spìosraidh mar chnò mheannta, peabair is salann, agus fiù ‘s craiteachan dinnsear bleithte!

Thug mi chun ghoil e, agus lean mi orm ga chaoin-bhruich beagan mhionaidean a bharrachd, agus ga chur mun chuairt corra uair.

Aig an deireadh, leag mi an càise Cheddar Albannach (seadh, fhuair mi càise Albannach ann an Iapan) anns a’ phrais, agus leig mi leis leaghadh agus tlàmachadh leis an t-sùgh mus do chuir mi romham fhèin e anns a’ bhobhla! Ghabh mi le pearsal ùr e agus brobhd mhòr arain!

Dealbh air eisimpleir de nadh' fhaodadh a ghabhail mar annlan leis no an dèidh na bruthaist.

aran-buntàta nira air liatas, sliasaid mhairteòil le sabhs soighia agus sgeallag.

Aran-buntàta le saidse-gairleag nira.

2009-01-18T00:03:00.000-08:00

‘S iomadh ceangal làidir a tha ann eadar dualchas dùthchannan na h-Eòrpa. ‘S lèir dhuinn sin cho soilleir ri criostal ann am biadhan gach dùthaich is ceàrn.
Roimhe, chroch mi an reasabaidh air a’ bhlog seo airson aran-buntàta agus ‘s ìongantach mur nach eil daoine eòlach air a’ bhiadh mheasail seo air feadh Bhreatain is Eirinn – ‘s chan ann a-mhàin Alba.

Saoil an tug muinntir Bhreatainn agus Eirinn feart gu bheil an dòigh air aran-buntàta a dheasachadh gu math math coltach ris a' bhiadh Eadailtich, gnocchi, ach a-mhàin gun cuirear uighean agus gum bruichear ann an uisg’ e?
Cha tug no mise, gus an do thòisich mi air an aran-bhuntàta agam fhìn a dhèanamh. Aon uair ‘s gun tug mi sùil air bhideo frangach a bha a’ sealltainn ciamar a nì gnocchi le bloinigean-ghàraidh, ‘s ann an uairsin a mhothaich mi dè cho cosail ri chèile is bha sin agus aran-buntàta!

Seo dhuibh biadh a bhios mi a’ dèanamh gu math tric aig an taigh, ‘s mi a’ fuireach ann an Iapan. Gu math tric, bidh mi a’ cleachdadh grìtheidean Iapanach no Aisianach ann am biadh Albannach. Mar eisimpleir, san reasabaidh seo.

Aran-buntàta le saidse-gairleag nira.

Niste, ‘s e a th’ ann an nira am facal Iapanais air lus a tha air ùr thighinn a-steach bho chionn ghoirid gu Ameireaga agus dhan Roinn-Eòrpa. ‘S e seorsa gairleag agus saidse a th’ ann aig an aon àm. Allium tuberosum is ainm laideann dha. Ma dh’ fhaoidte gum bi e doirbh lorg fhaighinn air ann an Alba, ach tha mi smaointinn gun dèanadh saidse fhèin a’ chùis mura faigh. Tha blas Nira coltach ri saidse ach le tòchd a’ ghairleag tighinn bhuaithe cuideachd.

Nira (saidse-gairleag)

Dòigh

An toiseach, dèan an t-aran-buntàta mar as àbhaist le bhith a’ bruich a’ bhuntàta ann an uisge goileach le salainn, agus ga phronnadh leis an ìm.

Dèan nighe an saidse-gairleag, air neo an saidse a-mhàin, agus bruich ann am prais e gun ola no geir sam bith, ach am bi e deiseil. Faodaidh tu an saidse-gairleag a phronnadh no a mhìn-sgudadh mus fill thu a-steach dhan bhuntàt’ e.

Thathar an uairsin a’ filleadh a’ mhìn-fhlùir a-steach ann mar as àbhaist ach am faighear taois nach lean ris a’ bhùird-fhuine agus a tha furasta a dh’ obrachadh.

Suathaich a’ phrais le beagan ìm no margarain, agus bruich mar sin fhèin iad air dà thaobh.

Sin agad e!

‘S toigh leam fhìn a bhith gam praighigeadh a-rithist as dèidh làimh ann an ola olaidh, ach cha leig thu leas sin a dhèanamh idir.

‘S iomadh tionndadh eile a th’ orra. Ma chuireas tu ugh anns an taois le càise, gheibh thu aran-buntàta le càise! Tha sin blasta cuideachd. ‘S ann a-rèir de do bhlas fhèin a tha seo.

An uairsin tha na toppings a-rèir do thoil fhèin mar an ceudna.

Eun-bhrìgh creamhach. (Cock a’ leekie)

2008-10-23T03:19:00.000-07:00

Dheasaich mi biadh dùthchasach Albannach an-diugh. Eun-bhrìgh – sin agad (brot no eanraich feòil-circe ), agus creamh, sin agad leigis (leek) agus dh’ obraich e gu math. Tha ainm eile air - Sugh creamhach.

Feumaidh tu:

Poit mhòr!
Creamh – tòrr dheth (ceithir no còig dheth).
Eun slàn airson goil.
Copan rus
Plumbaisean seargta (prùnaichean)
Salann
Piobair

Lìon a’ phoit le uisge agus cuir gu leòr salann is piobair ann.

An toiseach, tha thu a’ goil an eòin fad 1.5 gu 3 uairean a thìde (a-rèir a mheud), no gus am bi a fheòil maoth. Nuair a bhios e deiseil, thoir an t-eun às a’ phoit agus cuir an fheòil is na cnàmhan air leth a chèile.

Cuir an rus agus na plumbaisean seargta geàrrte anns a’ phoit agus thoir goil bheag fad 20-30 mionaidean a bharrachd e.

Cuimhnich gu feum tu uaireannan an lith (an cop) a thogail den uachdair feadh na còcaireachd. Bu chòir gu bheil an eanraich glan is gun chop air uachdair.

Sin agad e! Cho furasta sin. Faodar an fheòil a chur air ais dhan phoit, air neo, ga cleachdadh airson biadh eile a dhèanamh. Mas e ‘s gur e biadh Albannach eile nad bharail, dh’ fhaodadh tu sabhs ugh no sabhs capair a dhèanamh a thèid còmhla ri an fheòil.

Buntàta fìonach is mìn-choirc’

2008-09-23T06:08:00.000-07:00

An toigh leat buntàta? An-dà, seo seorsa de bhiadh ùr a rinn mi. Sìmplidh, ach blasta dhomhsa. (leis gur fìor thoigh leam mìn-choirce ann an rud sam bith!)

‘S e “Buntàta fìonach le mìn-choirc’” a thug mi air.

Feumaidh tu:

Ìm, ola olbh
Dà uinnean beaga, sgudaichte
Trì clòbhaichean ghairleag, mìn-shlisnichte
buntàta, ciùbaichte
beagan fìon geal
a’ dhealbh bheag sùgh liomaid
mìn-choirce, ghrèidhte (air neo, aran-coirce, mìn-bhriste)

Cuir na h-uinneanan is gairleag a-steach ann am prais dhomhainn leis an ìm ‘s ola, agus bruich iad greiseag.

Cuir am buntàta a-steach, agus cùm a’ dol a’ bruich a h-uile càil anns a’ phrais.

An uairsin, cuir a-steach an sùgh liomaid agus am fìon geal ‘s caraich ‘s measgaich a h-uile sian gu math ach nach tèid an stuth a losgadh am bonn na praise. Lùghdaich an teas chun ìre as ìsle, agus cur an ceann air a’ phrais.

Lean ort ga bhruich air teas ìseal, agus na dìochuimhnich salann agus piobair a chrathadh a-steach ann.

Mu dheireadh thall, nuair a tha e deiseal. Crath am mìn-choirce ann agus measgaich gu math e.

Rolan-arain clis

2008-08-22T11:44:00.000-07:00

Gritheidean

8oz mìn-fhlùr lom
Craiteachan salainn
½ spàineag rèidh soda bith-charbonach
Làn-spàinne rèidh pùdar-sgrisleach (cream of tartar)
½oz margarain
¼ pinnt bainne (⅔ chupa)
Beagan ugh togte airson gleans

Criathraich am flùr, salann, sòda bith-charbonach agus pùdar-sgrisleach ann am bobhla. Cuir am margarain ris agus suathaich a-steach e. Ceanglaich na gritheidean ri chèile leis a’bhainne ach an nìthear taois bhog.Tionndaich air uachdar i, agus taoisnich i ach am bi i rèidh. Roghnaich an taois ann an sia no ochd pìosan, agus dèan rolan orra.

Cuir air treidh’-fhuine crèisichte iad, thoir slìobadh sile an uigh dhaibh agus bruich ann an àmhainn iad aig gas 5/375℉/190℃ fad 15 mionaidean, air neo gus am bi iad òr-dhonn.

Biadh Iapain - Sushi

2008-07-17T11:49:00.000-07:00

Taghadh de shushi cumanta a gheibhear anns na h-olla-margaidean, mar as trice.

Biadh na Breatainn Bige – Far Breton

2008-06-29T00:15:00.000-07:00

Far Breton

Bho chionn 4 no 6 mìosan, bha mi a’ toirt sùil air làrach-lion às an Fhraing, air a bheil tòrr bhideoan teagasgach. Tha iad air an roinn ann an seòrsachan – còcaireachd, ealan, saidheans agus cuspairean eile. An-dà, ‘s e làrach Fhrangach a th’ innte, mar sin, saoil dè an cuspair air an robh an ùidh as motha agamsa? Cha can mi an còrr!

Tha an reasabaidh seo cho sìmplidh eadhan gun deach agam fhèin air a dheasachadh!

Far Breton

Grìtheidean

250g de mhìn-fhlùir
200g de shiùcar
5 uighean
1l de bhainne
125g de phlumbaisean seargta
Ìm saillte

Dòigh

Measgaich am mìn-fhlùr agus an siùcar.
Cuir na h-uighean ris, agus measgaich.
Cuir am bainne ris agus measgaich.
Cuir an t-ìm anns an t-soitheach, agus leagh e anns an àmhainn.
Sgaoil an t-ìm anns an t-soitheach.
Taom an t-ullachadh uile anns an t-soitheach.
Cuir na plumbaisean seargta a-steach ann aon is aon.
Bruich mu uair a thìde ann an àmhainn ro-theasaichte aig 190 puing celcius.

Leig leis an fhar fhuarachadh fad uair a thìde.

Breacagan Taigeis ann an sabhs-uinnean geal.

2008-02-22T18:25:00.000-08:00

Grìtheidean

Taigeis air a bhruich
2 bhuntàta mòr
4oz ìm
Craiteachan salainn
Uinnean mòr
Uisge-beatha

Cothlamadh Breacaig

6oz mìn-fhlùr lom
Ugh mòr
1 pinnt bainne
Ola

Sabhs

Leth-phinnt sùgh mairtfheòil
Uinnean mòr air a mhion-sgudadh
2oz ìm
2oz mìn-fhlùr
Craiteachan salainn is piobair
Uisge-beatha

Dòigh

Dèan nighe, rùsg agus an uairsin leth-bhruich am buntàta – leig leotha fhuarachadh, ‘s an uairsin geàrr nan ciùban de 1 ceudameatair. Cuir an dara taobh iad.

Cuir na grìtheidean uile ri chèile gus an cothlamadh breacaig a dhèanamh. Tog fad 2-3 mionaidean e, agus cuir am brolamas tro shìolachan.

Dèan breacagan tana le bhith a’ teasachadh pana-omelette crèisichte le ola gus an tig ceò às. Còmhdaich bun a’ phana leis a’ bhrolamais agus bruich fad 1 mhionaid e. Cuir car dhe agus bruich 1 mhionaid a bharrachd. Caith an cothlamadh breacaig uile.

‘S e an ath-cheum an sabhs a dhèanamh: Leagh an t-ìm ach am bi e donn; cuir an t-uinnean sgudaichte agus an t-uisge-beatha a-steach ann; cuir am mìn-fhlùr agus an sùgh (goileach) mun cuairt na cheann beag air bheag, ga chur mun cuairt fad na h-ùine ach am bi an sùgh ann uile. Thoir dha goil bheag ach am bithear deiseil a thoirt seachad do dhaoine.

Leagh an t-ìm ann an wok teth. Leig leis donnadh ‘s an uairsin grìosaich gu socair an t-uinnean mìon-gheàirrte ach am bi e maoth. Cuir uisge-beatha a-steach ann ‘s loisg e dheth.

Crathaich an taigeis a-steach dhan ìm ‘s na h-uinneanan ‘s cum a’ dol gam bruich air an socair. Cuir a-steach am buntàta glèidhte ann. Bruich fad 3-5 mionaidean a bharrachd ach am bi iad teth, ‘s an uairsin tog air spàinne an taigeis is cuir air breacag e. Roilig suas a’ bhreacag leis an stuth na broinn agus caraich air soitheach àmhainn dìonach crèisichte i. Glèidh san àmhainn iad fad 5 mionaidean.

Gabhaidh an toirt seachad leis an t-sabhs, agus air a sgeadachadh le beagan peirsill.

Faclan Feumail

Bruich – boil (potatoes); cook (in general)
Caraich air soitheach àmhainn-dìonach e – place it on an ovenproof dish
Cothlamadh breacaig – pancake mix
Craiteachan salainn – a pinch of salt
Crath – sprinkle
Cuir an dara taobh iad – Set them aside.
Cuir am brolamas tro shìolachan – pass the mixture through a sieve
Cuir X mun cuairt na cheann beag air beag – Stir X in gradually
Gabhaidh an toirt seachad~ – they can be served~
Grìosaich – (shallow) fry
Grìtheidean – ingredients
Leig leis ruadhachadh/donnadh – allow it to turn brown
Mìn-fhlùr lom – plain flour
Sùgh mairtfheòil – Beef stock
Taigeis – haggis
Tog – whisk (verb)

Aran-sòda

2008-02-22T17:57:00.001-08:00

Coq au Vin (Feòil-circe ann am fìon dearg.)

2008-02-22T17:47:00.000-08:00

Nuair a chuir mi rim shùil oidhirp a thoirt air Coq au vin an seo ann an Iapan, ‘s e leughadh alt a phiobraich an toiseach mi . Aithisg le Nigel Slater air 25 Samhain, 2001 anns The Observer, air an robh “Perfect Coq au Vin”!

Nach esan a bha togail cliù an t-soitheach ainmeil thraidiseanta seo sa chuid sgrìobhaidh. Tha e ga àrd-moladh, ga ghlòrachadh, agus an dèidh dhomh feuchainn mar a b’ fheàrr a b’ urrainn dhomh cumail ris an dòigh aige-san, tuigidh mi a bheachd! ‘S ann a tha mi ag aontachadh ri na thog e mu dheidhinn eachdraidh a’ choimisg bidhe seo. Mar a bhios a h-uile nì, is grìtheid bidhe a tha na lùib a’ freagairt a chèile agus nach gabh an sgaradh bho chèile. Mar a thathar a’ cumail cuimhne bho chian nan cian air an t-soitheach àraid àrsaidh seo, na dhearbhadh air a luach ‘s a chliù ‘s a bharantachd. Seo e ma-tà…an coimeasg a thug e dhuinn ach le beagan atharrachadh.

Coq au Vin

(Sàth ceathrar.)

Coileach mòr, geàrrta aig na h-altan ann an 6 no 8 pìosan; turasgar is closach glèidhte
Uinnean, curran agus corra eitean piobair airson an t-sùigh
150g hama tiugh neo-rèiste
30g ìm
2 uinnean meadhanach
Curran mòr
2 chlòmh gairleige
2 spn-bhùird mìn-chruithneachd
2 spn-bhùird cognac
Botail fìon dearg
Corra gheugan beaga lus an rìgh
3 duilleagan labhrais
40g ìm
12 uinnean beaga, rùisgte
200g balgan-buachair
Buntàta, ròiste, bruich no ceò-theasaichte.

Caraich an closach circe, leis a thurasgar is fuigheall nan cnàmhan ‘s na feòla na chois, ann am pana domhainn. Còmhdaich thairis le uisg' e, cuir uinnean agus curran ann, leth-dhusan eiteanan piobair slàn agus thoir chun ghoil e. Lùghdaich an teas agus fàg e na chaoin-bhruich gus am bi feum agad air.

Geàrr an hama na stiallan tiugha; cha mhòr nach fheum iad a bhith cho tiugh ri do lùdag. Bruich san ìm iad ann an soitheach-casaroile trom – bhiodh prais iarann geiltrigte dìreach taghta – agus fàg iad gam bruich air teas meadhanach. Measg an hama bho àm gu àm - chan fhimir gun tèid e na ruadhan – ‘s an uairsin, nuair a tha e òr-dhonn, tog às e ‘s a-steach ann am bobhla, a’ fàgail an geir sa phrais.

Saill ‘s peabraich na pìosan circ-fheòil agus caraich anns a’ gheir theth sa chasaroile iad, ach an teachd iad ann gu gaireil gun a bhith ro theann ri chèile ‘s nach bruichear iad. Cuir car dhiubh nuair is òrdhonn na taobhan ìochdar. Bu chòir an craiceann a bhith air dhreach na meala seach donn – ‘s e an dathachadh seo as deatamaiche do bhlas an t-soithich. Tog às a’ chirc-fheòil agus caraich anns a’ bhobhla e leis a’ hama. Is còir agad a-nis linnseag sglaidhp a bhith ann an tòin na praise (dith thiugh gheir). Thig mòran den tòchd is blas às an seo.

Fhad ‘s a tha a’ chirc-fheòil a’ dathachadh sa phana, rùisg agus garbh-ghearr na h-uinneanan ‘s an curran. Cuir na h-uinneanan ‘s an curran anns a’ phana, gun a’ chirc-fheòil, agus bruich air an socair iad, gan cur mun cuairt bho àm gu àm gus am bheil an t-uinnean air dhreach criostalach agus sgiom a' phana air a leaghadh beagan. Cuir ris an gairleag, rùisgte mìn-shlisnichte, san àm sin. Cuir a’ chirc-fheòil ‘s an hama air ais sa phana, suath a-steach a’ mhìn-chruithneachd agus leig leis a h-uile sian bruich fad mionaid no dhà mus dòirtear ann a’ chognac ‘s an fhìon, agus mus caraichear na luibhean fon na feòla gu seasgair. Taom làn-lèighean dhen t-sùgh-chirce caoin-ghoileach ach an lìonar thairis air a’ chearc. Thoir chun ghoil, ‘s an uairsin, ceart air dha bhith ri ghoil, tionndaich sìos an teas gus an sabhs a chaoin-bhruich. Cuir ceann air leitheach beul na praise.

Leagh an t-ìm ann am pana beag agus cuir ann na h-uinneanan beaga rùisgte, ‘s an uairsin na balgan-buachair, gan gearradh nan dà leth, air neo gan cairtleadh, ma bhios iad ro mhòr. Fàg iad gam bruich gus am bheil iad òrdhonn, agus an uairsin, cuir ris a’ chirc-fheòil iad le salainn is piobar. Thoir sùil air a’ chirc-fheòil an dèidh 40 mionaid feuch dè cho maoth is a tha i. Bu chòir dhi bhith tais ach gun a bhith a’ tuiteam far a cnàmhan. ‘S dòcha gun toir e uair a thìde, a-rèir an t-seorsa chirce a tha thu a’ cleachdadh. Tog a’ chearc às a’ phana ‘s caraich ann am bobhl’ i.

Tionndaich suas an teas fon t-sabhs agus fàg e na dhian-phlubadh ach an lùghdaichear beagan e. Mar a ghoileas an sabhs sìos, fàsaidh e nas tiugha – gun a bhith tiugh ge-tà – agus thèid e na lìomh.

Cuir a’ chearc air ais sa phana agus thoir seachad leis a’ bhuntàta i.

‘S e tionndadh Gàidhlig a tha seo air aithisg Beurla le Nigel Slater

SABHS SGEALLAGACH AIRSON MARAG DHUBH

2008-02-04T19:49:00.000-08:00

SABHS SGEALLAGACH AIRSON MARAG DHUBH

Grìtheidean

Clòmh gairleige
Leth-uinnean dearg
Gloine fìon geal
Uachdar tiugh
Dà spàin-teatha sgeallag ghràin

Grìosaich an gairleag agus cuir na snaoisean mharag dhuibh ris.
Cuir a-steach an t-uinnean agus cum a’ dol gam frithigeadh.
Taom a-steach gloinne fìon geal agus lùghdaich an dàrna leth dheth.
Suath a-steach an t-uachdar tiugh agus an dà spàin-teatha sgeallag ghràin, agus leig leis an t-sabhs builgeadh mus cuirear dheth an teas.

Staoig leasradh uachdair le sabhs fìon dearg

2007-10-10T09:21:00.000-07:00

2 mheanbhuinnean meadhanach, mion-gheàrtte

1/2 cupa fìon searbh dearg
1/2 cupa sùgh (circe, mairt, uan-fheòil, no fiadh-fheòil)
1 spàin-bhùird fìon-geur olach(balsamic)
1 spàin-teatha sgeallag Dijon
3 spàinean-bhùird ìm gun salainn, air a ghearradh na phìosan
1 spàin-teatha duilleagan ùra lus-an-rìgh, mion-gheàrtte
Salann agus piobar dubh bleithte, ri do bhlas fhèin

‘S e seo dòigh sìmplidh math gus diathad bhlasta shùghail a dheasachadh.

An dèidh dhuit na staoigean a ghrìosachadh air teas àrd ann an sgileid no aghann iarainn/grìosaich, thoir a-mach iad, ach glèidh an geir anns an robhas gam bruich. Bu chòir gu bheil corra phìosan donna de dh’fheòil air am fàgail anns a’ phana. Cuir na meanbhuinneanan a-steach agus bruich iad air teas ìseal ach am fàs iad trìd-shoillseach.

An uairsin, taom a-steach am fìon, ‘s an sùgh-feòil agus thoir gu goil. Ma sgrìobas tu bonn a’ phana le spàin-mhaide, gabhaidh na pìosan donna am filleadh a-staigh dhan t-saibhse. Tha thu ga ghoil ach an lùghdaicheas leth-chuid dhen lionn.

Lùghdaich an teas ach am bi e meadhanach, cuir am fìon-geur olach ‘s an sgeallag Dijon ris, agus bruich an sabhs ach am bi a thiughad ri do thoil. (Cha toir mi dhuit amannan bruich oir tha caochladh diofar stòbhan agus cucairean aig daoine.)

Ma chuireas tu ìm ris an t-saibhse, air dhuit an aghann a thoirt dheth an teine, cuidichidh sin ann a bhith ga thiughachadh, agus bheir e dha gleus mhath shlìogarra. Cuir lus-an-rìgh ùr ris agus dèan blasta e le salann is piobar.

Sukiyaki!

2007-03-23T06:44:00.000-07:00

Sukiyaki!

An toigh leat am biadh ainmeil seo? `S e a th`ann ach pàirt dhen t-seòl-còcaireachd ris an canar “Nabemono” ann an Seapannais. `S e prais a th` air “nabe”, `s mar sin dheth, chan e ach “Biadh a tha air a dheasachadh ann am prais”. Mar as trice, `s ann am meadhan a` bhùird a thathar a` dèanamh “biadh-prais” - air stòbh beag. Tha dà sheorsa prais a thathas a` cleachdadh airson an t-seòl-còcaireachd seo. Am fear air a bheil sinn eòlach (cast-iron pot ann am Beurla), agus poit-creadha.

Airson Sukiyaki, bidh daoine a` gabhail cuibhreannan mar a thoileas iad bhon phrais seo anns a bheil measgachadh de ghlasraich le feòil-mhàirt agus tofu. `S e a th` anns an t-sùgh Sukiyaki – sabhs-soigha, siùcar, sake agus mirin. Leis gu bheil e cho teth, `s am prais a` goil mu do choinneamh, thathar a` bogadh an cuibhreann agad ann an ugh amh airson fhuarachadh.

A` gabhail cuibhreann às a` phrais agus ga bhogadh ann an ugh amh.

Seo an dòigh-còcaireachd:

An toiseach, thathar a` leaghadh blonag sa phrais, agus a` bruich an fheòil-mairt greiseag. An uairsin, thathar a` cur an càl sineach agus na glasraichean agus tofu uile ann agus a` cur riutha an sabhs-soigha, siùcar agus mirin. Tha an càl sineach gu math cudthromach, oir tha tòrr uisge a` tighinn às nuair a thèid a bhruich agus tha sin a` ciallachadh nach eil feum air uisge a chur ris a` phrais airson an t-sùigh.

Nuair a dh`èireas an t-sùgh, thathar a` cur an sake ris. Sin agad e!

Sushi! Airson biadh-nòin - chan eil beat air!

2007-03-18T06:57:00.000-07:00

Seo an taigh-bìdh sushi anns an robh sinn airson biadh-nòin. Cha do ghabh mi sushi fad mìosan, `s mar sin, chòrd e rium gu mòr ga ithe.

昔のお寿司職人は(昔は冷凍まぐろが出来なかった)
試行錯誤の上、まぐろがきたら、すぐに醤油に漬けて日持ちする方法を考えた。

An dèidh do chòcairean sushi bho shean iomadh oidhirp a dhèanamh an cuid tùna a ghleidheadh (cha robh fionnadairean ann san àm sin), smaoinich iad air dòigh a chumadh fada e. Mus gann a thigeadh an tùna, chuireadh am bogadh ann an sabhs-sòigha. An-diugh, gheibhear an tùna seo fon ainm Dzukemaguro (付けマグロ) anns na taighean-bìdhe sushi. Seo e, `s mi ga ithe Dihaoine seo chaidh.

Dh`iarr mi brot cuideachd, agus seo e.
Brot Crùbag (à la miso!) 　

An-dà, chan eil cinnt agam an e partan no crùbag no rùdhag an t-ainm as fheàrr a thoirt air an gnè Sheapannach seo de phartan. Ach, tha partan ro bheag. Tha meud crùbag co-ionnan ris ach tha a` chrùbag Albannach ruadh cia-tà, agus bha seo dearg...(leis gu robh e air a bhruich, `s dòcha!). Co-dhiù, bha e tuilleadh is blasta! Dìreach àlainn.

Dh`fheumadh dhomh ùine mhòr gus na ghabh sinn de shoithichean sushi a thoirt seachad dhuit, ach seo soitheach eile – ama-ebi. `S e seorsa de charran a th`ann. “Carran-milis” ann an Seapannais. Tha e fìor mhath.

Mu dheireadh, seo dhuit dealbh dhen deoch a bha sinn ag òl leis a` bhìdh.
`S e mìn-tì uaine a th` ann. Slàn leat an-dràsta.

Flana/Paidh-ubhail le branndaidh agus siorap mèibeal

2007-02-03T06:02:00.000-08:00

Pastraidh shortcrust

2 chupa mìn-fhlùir
4 unnsaichean ìm (125g, 1 bata)
2 spàin-bhùird siùcar caster
buidheagan ùgh
1 spàin-bhùird uisge fuar
ìm airson a` suathadh an t-soitheach flana
pònairean sheacte no ris a lìonadh am pigheann

An Lionan

Siorap mèibeal
Ubhlan (4, meadhanach mòr)
Ugh (2, air an togail)
Branndaidh
Fìon-dearcan sheacte
Siùcar donn

Dòigh

An toiseach, bog na fìon-dearcan sheacte ann an glainne bheag bhranndaidh.

Dèan am pastraidh shortcrust agus bruich ann an àmhainn e fad 15-20 mionaidean.

An uairsin, slisnich na h-ùbhlain agus càraich gu grinn iad anns an t-soitheach flana.

Leagh an t-ìm, an siùcar donn agus an siorap mèibeal ann am pana fhad `s a tha thu gam measagachadh gu math, agus an uairsin, cuir dheth an teine.

Leig leis fuarachadh beagan, 's an uair sin, cuir an dà ùgh togte agus na fìon-dearcan sheacte anns a` bhranndaidh ris a` bhrolamais lionn. Tog gu math e.

Taom am measgachadh uile air na h-ùbhlan. Bruich ann an àmhainn aig 180 puing celsius fad 30-40 mionaidean.

Pigheann/Pastraidh shortcrust

2007-02-03T05:53:00.000-08:00

Cungaidh

2 chupa mìn-fhlùir
4 unnsaichean ìm (125g, 1 bata)
2 spàin-bhùird siùcar caster
buidheagan ùgh
1 spàin-bhùird uisge fuar
ìm airson a` suathadh an t-soitheach flana
pònairean sheacte no ris a lìonadh am pigheann

Dòigh

Ro-theasaich an àmhainn gu 180C/350F/Gas Marc 4.

Suath soitheach-flana le ìm.

Criathraich am flùir lom ann am bobhla mòr agus cuir an t-ìm ris. Suath an t-ìm sa mhìn-fhlùir ach am faighear measgachadh coltach ri pronnagan-arain agus cuir an siùcar ris. Measgaich gu math e. An uairsin, cuir am buidheagan agus an t-uisge agus measgaich ach an tèid e na thaois bhog. Dèan ball dhith.

Cuir a-mach am pastraidh eadar dà dhuilleag de dh`fhuirleach, briog le forc air fheadh agus lìon soitheach-flana leis. Còmhdaich e le film claonach agus càirich ann am fionnaradair fad 20 mionaidean.

An-dà, cuir pàipear greaseproof no foidhle air a` phastraidh agus sgaoil gu rèidh breath de phònairean sheacta no ris air. Fuin san t-àmhainn ach am bheil e deiseil. Leag às am pàipear, pònairean no ris.

Aran-buntàta

2007-01-28T09:21:00.000-08:00

Cungaidh: Buntata

Ìm

Salann

Mìn-fhlùr

Innealan: Prais, bobhla, plocan, bòrd fuine, sgian.

Seo reasabaidh cho furasta a dhèanamh!

Dòigh

An toiseach, rùisg am buntàta agus bruich iad mar seo ann an uisge salainn.

Nuair a bhios am buntàta gu bhith deiseil airson pronnadh, leagh an t-ìm. Traogh am buntàta agus measgaich an t-ìm gu math anns a` bhuntàta fhad `s a tha thu ga phronnadh le plocan ann am bobhla.

Tha thu an uairsin a` cur mìn-fhlùir ris a` phronnagan ach am faighear taois nach eil ro thioram, agus gun a bhith ro fhliuch a bharrachd.

Cuir a-mach an taois gu tana agus dèan roinn dhith le sgian. Briog le forc air a feadh.

Crèisich pana trom le ìm agus bruich an t-aran-buntàta fad 2-3 mionaid air gach taobh.

`S math leams` iad aig biadh na maidne, le ugh ròsta agus hama, tomàto, is mar sin air adhart! Ach bhiodh iad blasta aig tràth sam bith, le feòil sam bith…m.eismpleir – staog is glasraichean cuide riutha.

Mousse a` Bhradain

2007-01-27T09:45:00.000-08:00

Seo reasabaidh a fhuair mi bho mo mhàthair agus cuiridh mi dealbhan ris nuair a bheir mi dall air.

Cungaidh: 1x8unns tiona bradan dearg
(roghainneil 2 shliseig bradan smocte)
4 spàin-bhùird rèidh de dheileatain
3 spàin-bhùird uisge teth
1 spàin-bhùird sùgh liomaid
¼ pinnt uachdar tiugh
¼ pinnt mayonnaise
salann & peabar
1 spàin-teatha Sabhs Lea Perrin

Traogh am bradan agus thoir às an craiceann agus na cnàmhan mum pronnar leis a` bhradain smocte e.

Cuir mayonnaise ris agus measgaich gu math e. Cuir salann `s peabar ris a-rèir do bhlais.

Tog an t-uachdar agus fill anns a` phurralais e.

Ruith an deileatain ann an uisge teth gun a bhith ga theasachadh ach mura leaghas ceart e. (Tha thu a` cur an deileatain ris an t-uisge seach na bhith a` cur uisge teth ris an deileatain. Ma dh`fheumas tu, teasaich am bobhla os cionn uisge teth. Na cuir uisge teth ris an deileatain air chor sam bith.)

Cuir an deileatain agus an sùgh liomain ris a` phurralais le bhith gam filleadh ann. An uairsin, gluasad gu ramaigeanan no gu mòlltair silidh e.

Ma `s e mòlltair a thèid a chleachdadh, suathaich gu spìocach le rud beag ola mun dèanar feum dheth.

Sgrìob bìdh ort? Gabh sgonaichean ma-tà!

2007-01-04T04:01:00.000-08:00

powered by ODEO

Feumaidh tu : 8 unnsaichean/2 chupa/250g flùr-èirigh (no mìn-fhlùir le 3 spàin-bhùird pùdar-fuine/sòda arain)

Craiteachan salainn

Ugh (air a thogail)

140ml/¾ chupa Uachdar (bàrr) (sin a chleachd mise, ged `s e
“uachdar goirt” san reasabaidh)

1 oz/250g/¼ bhat` ìme

Dòigh

An toiseach, tha thu a` fasgnadh a` chungaidh thioram uile ann am bobhla agus a` suathadh an t-ìm a-steach gu math san fhlùir gu lèir.

An uairsin, tha thu a` toirt toll anns a` mheadhan agus a` taomadh an t-uachdar agus an t-ugh ann...mar seo

Ma mheasgaicheas tu ri chèile iad, bu chòir gum faigh thu taois bhog, shùbailte.

Tha thu ga fuine greiseag air bòrd-fuine còmhdaichte le flùr, agus ga cur a-mach (le do làmhan, no le rolar-fuine) gu mu leth-òirleach(1.2cm) a thiughad. Cùm a` dol ag obrachadh oirre, ach am faigh thu an cruth a thoilicheas tu.

Leis nach eil gearradair-sgona agam, bidh mi ga roinn le sgian ann an triantanan.

Feumaidh tu cuideachd an taois a bhriogadh le forc ceithir timcheall mun tèid i a-steach dhan àmhainn.

Ro-theasaich an àmhainn gu 200ºC/400ºF agus fuin iad fad 10-20 mionaidean.

Tha iad math le màgaraid no ìm agus silidh, no mil agus gu h-àraid tha iad nas fheàrr blàth.

Faclan Feumail

flùr-èirigh – self-raising flour
pùdar-fuine – baking powder
sòda arain – baking soda (Rosshire dialect)
Craiteachan – a pinch of
air a thogail – beaten
uachdar goirt – sour cream
bhat` ìme – stick of butter
a` criathradh/a` fasgnadh/a` cur tro shìolachan – sieve
a` chungaidh – the ingredients
a` toirt toll anns a` mheadhan – make a hole in the middle
taois- dough
fuine – knead/(N.B also means “bake”)
obrachadh air – kneading it
cur a-mach – roll out/pat out
rolar-fuine – rolling pin
a thoilicheas tu – that satisfies you (lit: that pleases you)
a` briogadh ceithir timcheall – prick all over
ceithir timcheall – all over (air feadh)
àmhainn – oven
màgaraid – margarine
silidh – jam
mil - honey